लेखक तथा निर्देशक छेतन गुरुङकाे निधन

चलचित्र लेखक तथा निर्देशक छेतन गुरुङको निधन भएको छ । गुरुङको बुधबार बिहान २ बजे राजधानीको महाराजगञ्ज स्थित मेटो अस्पतालमा उपचारको क्रममा गुरुङको निधन भएको हो । २०३५ साल माघ २२ गते जन्मिएका गुरुङको ४२ बर्षको अल्पआयु मै निधन भएको हो । अचानक बिरामी भएपछि सोमबार गुरुङलाई अस्पताल भर्ना गरिएको थियो ।

दिनेश राउत निर्देशित सन् २०१४ को चलचित्र नोभेम्बर रेनको कथा, पटकथा र सम्बाद लेखेर उनी यस क्षेत्रमा भित्रिएका थिए । तत् पश्चात उनले सन् २०१५ को चलचित्र आभाषमा गीत लेख्नुका साथै एक गीतमा संगीत समेत दिएका छन् ।

गुरुङले सन् २०१६ को चलचित्र क्लासिक, सन् २०१७ को चलचित्र डायरी र सन् २०१९ को चलचित्र ए मेरो हजुर ३ को समेत लेखन कार्य गरेका थिए ।

यस्तै सन् २०१८ को चलचित्र डमरुको डण्डिबियोको कथा लेखन तथा निर्देशन समेत गुरुङले गरेका थिए । गुरुङले लेखन, निर्देशन गरेको अर्को चलचित्र प्रेमगीत ३ प्रदर्शनको लागि तयारी अवस्थामा छ । पछिल्लो समय छेतन हुतुतु नामक चलचित्रको लेखनमा व्यस्त थिए ।

गुरुङ डेब्यु चलचित्र नोभेम्बर रेनबाट नै उत्कृष्ट लेखकका रुपमा आफुलाई उभ्याउन सफल थिए । उनले सोही चलचित्रबाट २०७१ सालको एनएफडिसी राष्ट्रिय चलचित्र पुरस्कारमा उत्कृष्ट लेखकको अवार्ड समेत प्राप्त गरेका थिए ।

यस्तै निर्देशकका रुपमा पनि गुरुङ पहिलो चलचित्रबाट नै अब्बल साबित थिए । उनले निर्देशन गरेको पहिलो चलचित्रबाट २०७६ सालको कामना फिल्म अवार्डमा उत्कृष्ट नवनिर्देशक र २०७६ सालको डि सिने अवार्डमा जुरी अवार्ड हात पार्न सफल भएका थिए ।

स्वर्गिय गुरुङको दिवंगत आत्मको चिर शान्तिको कामना ।

Got Something To Say: